Serov (lidn)

Serov
Серов
Lidnanznam;	Flag;
Valdkund	Venäma
Eläjiden lugu (2025)	91,550 ristitud
Pind	418 km²
Pämez'	Vasilii Sizikov; (eloku 2018—)
Telefonkod	+7−34 385-xx-xxx
Avtokod	66, 96, 196
Aigvö	UTC+5 (MSK+2)

Serov (ven.: Серо́в) om Venäman lidn da raudtesol'm Sverdlovskan agjan pohjoižes. Se om agjan videnz' lidn eläjiden lugun mödhe, Serovan ümbrikon (edel 2025. vot — lidnümbrikon) administrativine keskuz da pala. Enččen Serovan rajonan pala mülüb ümbrikho vn 2017 redukuspäi.

Istorii

Mansid oma tahondan igähižen rahvahan. Nügüdläižen eländpunktan aluz om pandud vn 1894 semendkus kuti Nadeždinskii-radnikžilo sauvomha da holitamha raudterel'soiden ühtennimišt metallurgišt tegint, ottihe rel'soid sauvomha Transsibad. Nimitihe Bogoslovskii-kaivuzümbrikon Nadežda Polovcova-pidajan nimen mödhe. Vn 1919 15. päiväl sügüz'kud radnikžilo sai lidnan statusad Nadeždinsk-nimenke. Vll 1934−1937 sen nimi oli Kabakovsk Sverdlovskan agjan Ivan Kabakov-päsekretarin kanzannimen mödhe. Vn 1939 7. päiväl kezakud udesnimitihe lidnad nügüdläižikš pölištunuden NSTÜ:n vägimehen Anatolii Serov-lendajan kanzannimen mödhe. Vspäi 1963 lidn om alištunu agjan tobmudele oikti.

Serov šingotase raudan metallurgijan kahtel tegimel (teraz, raudühthesuladused), mašiništonsauvomižel (mašiništ samižsarakon täht, pidatimed), mecan ümbriradmižel, sömtegimištol i sauvondmaterialiden sarakol (raudbetontegesed).

Geografijan andmused

Lidnan sijaduz agjas i valdkundas (2007)

Lidn sijadase ümbrikon päivlaskmas, Pohjoižen Uralan taga, Kakv-jogen (ven.: Ка́ква, 170 km pitte) hural randal tobjimalaz, läz sen lanktendan sijad Sos'v-jogehe oiktalpäi, Sos'van oiktal randpolel, 105 m ü.m.t. keskmäižel korktusel.

Matkad Jekaterinburghasai om 308 km suvhe orhal, 353 km avtotedme vai raudtedme. Lähembaižed lidnad oma Krasnoturjinsk kaks'kümnes seičemes kilometras lodeheze orhal, 33 km avtol vai raudtel, i Karpinsk 36 km lodeheze orhal vai 46 km avtotedme.

Klimat om terav kontinentaline. Voden keskmäine lämuz om +0,8 C°, kezakun-elokun +14,5..+18,0 C°, tal'vkun-uhokun −13,7..−16,2 C°. Ekstremumad oma −51,5 C° (viluku) i +39,6 C° (heinku). Kezaaigan minimum om −6,6 C° (kezaku), tal'vaigan maksimum om +11,0 C° (uhoku). Voib panda halad kezaaigan miččel taht kul (heinkun minimum om −1,3 C°). Voib olda pakaižid −25 Cel'sijan gradushasai redukus-sulakus. Paneb sadegid 493 mm vodes, enamba heinkus-elokus (77..84 mm kus), vähemba tal'vkus-keväz'kus (21..29 mm kus).

Eläjad

Vn 2010 Venäman rahvahanlugemižen mödhe lidnan eläjiden lugu oli 99 373 ristitud, lidnan ümbrikon ühesa kümnendest, vn 2021 — 94 211 ristitud. Kaik 97 762 eläjad oli lidnas vl 2017. Kaikiš suremb lidnan ristitišt oli 104 tuhad eläjid vl 1967 i vll 1989−1991 (104 158 rist. vl 1989).

Rahvahad (ozutadud rahvahudenke vl 2010): venälaižed — 92,6 %, totarlaižed — 3,3 %, azerbaidžanlaižed — 1,0 %, toižed rahvahad — 3,1 %.

Ortodoksižen hristanuskondan nell' pühäpertid^[1] oma kaičenus i saudud lidnas: Sündun Toižetamižen päjumalanpert' (om saudud tošti vodele 2007), kaks' jumalanpertid i časoun'. Islaman pämečet' om letud vodele 2011.

Openduz

Lapsiden opendusen aluzkundad oma severz'-se päivkodid, keskškolad.

Kaik kaks'toštkümne aluzkundad (tehnikumad, kolledžad da profškolad i niiden filialad), Uralan valdkundaližiden tehnižen i pedagogižen universitetoiden (Jekaterinburg) filialad oma lidnan professionaližen opendusen aluzkundoikš. Niiden kesken oma Serovan politehnine tehnikum^[2] i Serovan holitišiden sferan da sömižen tehnikum^[3].

Galerei

Keskškol nomer 20 i muštnik A.K. Serovale (2008)
Sündun Toižetamižen päjumalanpert' i sen torg, vn 2012 nägu
Metallurgine tegim A.K. Serovan nimed vl 2008 i istorine puine pertišt
Serovan raudühthesuladusiden tegim vl 2012
Serovan metallurgine tehnikum (2018)
Lapsiden da norišton sädamižen keskuz (2008)
Sömižen fabrik i «Krugläška»-kafe vl 2018
Ujundbassein (2008)
Avtobusstancii vl 2008
Serov-päraudtestancijan sauvuz vl 2015

Homaičendad

Irdkosketused

Municipaližen ümbrikon tobmuden sait (adm-serov.ru). (ven.)

Serov (lidn) Vikiaitas

	Sverdlovskan agjan lidnad
	Alapajevsk \| Alasald \| Alasergid \| Alatagil \| Alatur \| Aramil' \| Artömovskii \| Asbest \| Berözovskii \| Bogdanovič \| Degtärsk \| Irbit \| Ivdel' \| Jekaterinburg \| Kačkanar \| Kamensk Uralal \| Kamišlov \| Karpinsk \| Kirovgrad \| Krasnoturjinsk \| Krasnoufimsk \| Krasnoural'sk \| Kušv \| Lesnoi \| Mihailovsk \| Nevjansk \| Novoural'sk \| Pervoural'sk \| Polevskoi \| Rež \| Revd \| Serov \| Severoural'sk \| Sisert' \| Sredneural'sk \| Suhoi Log \| Zarečnii \| Talic \| Tavd \| Turinsk \| Uz' Läl' \| Verhoturje \| Volčansk \| Üläpišm \| Üläsald \| Ülätagil \| Ülätur

[1] Serovan pühäpertid sobory.ru-saital. (ven.)

[2] Serovan politehnižen tehnikuman sait (sptserov.ru). (ven.)

[3] Serovan holitišiden sferan da sömižen tehnikuman sait (stsoip.ru). (ven.)

[1]

[2]

[3]