Asbest (lidn)

Asbest
Асбест

Lidnanznam	Flag
Valdkund	Venäma
Eläjiden lugu (2023)	56,533 ristitud
Pind	107 km²
Pämez'	Natal'ja Tihonova (sügüz'ku 2015—)
Telefonkod	+7−34 365-xx-xxx
Avtokod	66, 96, 196
Aigvö	UTC+5 (MSK+2)

Asbest (ven.: Асбе́ст) om Venäman lidn da lidnümbrik Sverdlovskan agjan suves.

Istorii

Eländpunktan aluz om pandud vl 1889 kuti Kudel'k-žilo (ven.: посёлок Куделька) samha asbestad. Vl 1928 udesnimitihe sidä Asbest-radnikžiloks. Vl 1933 radnikžilo kätihe lidnaks agjan alištusenke. Vspäi 2006 lidn om olmas Asbestan lidnümbrikon keskusen.

Asbest-lidn šingotase azbestan samižel i sen jändusiden ümbriradmižel (magnijantegim), asbesttegesiden, savičun i hrustal'tegesiden pästandal.

Geografijan andmused

Lidn sijadase mecoiden keskes, Keskuralan päivnouzmaižil pautkil, Sur' Reft-jogen oiktal randal tobjimalaz (Obin bassein), 220 m ü.m.t. keskmäižel korktusel.

Matkad Jekaterinburgan keskushesai om 86 km suvipäivlaskmha. Lähembaižed lidnad — Suhoi Log 37 km päivnouzmha orhal vai 48 km avtol i Zarečnii 34 km suvhe.

Klimat om ven kontinentaline. Heinkun keskmäine lämuz om +19,2 C°, vilukun −12,5 C°. Paneb sadegid 503 mm vodes, enamba heinkus (90 mm), vähemba keväz'kus (15 mm).

Tobmuz

Asbestan lidnümbrikon sijaduz agjas vn 2013 kartal

Kaik kaks' žilod mülüdas lidnümbrikho Asbestan ližaks: Belokamennii (1932 rist. vl 2010) i Krasnoarmeiskii (490 rist. vl 2010). Lidnümbrikon pind — 767,9 km², se mülüb agjan Suvižhe ohjastuzümbrikho. Asbestan lidnümbrik ümbärdab Mališevan lidnümbrikod kaikiš polišpäi.

Lidnümbrikon tobmuden pämez' om sen Administracijan pämez'. Edeline Administracijan pämez' om Vladimir Susloparov, radoi vn 2015 sügüz'kuhusai. Lidnümbrikon Duman ezimez' om Leonid Remezov vn 2022 redukuspäi. Edeližed Duman ezimehed oma Sergei Larionov (tal'vku 2019 — reduku 2022 päiči vn 2020 elokus-tal'vkus), Andrei Samarin (kül'mku 2017 — tal'vku 2019).

Eläjad

Vn 2010 Venäman rahvahanlugemižen mödhe lidnan eläjiden lugu oli 68 893 ristitud, lidnümbrikon — 71 315 ristitud, vn 2021 lidnan — 57 317 ristitud. Vl 2017 kaik 64 666 ristitud elihe lidnas i 66 955 ristitud kaikes lidnümbrikos. Kaikiš suremb lidnan ristitišt oli 85 100 eläjad vl 1992.

Ortodoksižen hristanuskondan kaks' jumalanpertid, protestantižen hristanuskondan jumalanpert' i islaman pühäpert' oma saudud lidnas.

Lapsiden opendusen aluzkundad oma severz'-se päivkodid, keskškolad, lapsiden sädamižen keskuz. Professionaližen opendusen aluzkundad oma Asbestan politehnikum i Asbestan čomamahtoiden kolledž, mugažo üläopendusen nellän aluzkundan (kaik — Jekaterinburg) filialad.

Galerei

• 
  Kul'turkeskuz (2001)
• 
  Ph. Vladimir-ruhtinasen jumalanpert' (ortodoksine hristanuskond), vn 2020 nägu
• 
  Baženovon azbestkar'jer lidnas vn 2007 uhokus
• 
  Avtostancii vl 2007
• 
  Jonuz i ted Asbest-raudtestancijal vl 2013

Tetabad sündnuded

• Aleksandr Kozlov (1961−2001) — oli Venäman muzikanvändai da muzikankirjutai.
• Gleb Samoilov (sünd. 1970) — Venäman muzikanvändai, runokirjutai da muzikankirjutai.
• German Sitnikov (sünd. 1932) — Nevondkundaližen Ühtištusen i Venäman baletan artist da baletmeister.
• Jurii Soldatov (sünd. 1940) — Nevondkundaližen Ühtištusen i Venäman skul'ptor.

Irdkosketused

• Lidnümbrikon tobmuden aluzkundoiden oficialine sait (asbestadm.ru). (ven.)
• Asbestan lidnümbrik Sverdlovskan agjan oficialižel midural.ru-saital. (ven.)
• Lidnan informacine sait (asbest.name). (ven.)