Krasnoufimsk

Krasnoufimsk
Красноуфимск
Lidnanznam;	Flag;
Valdkund	Venäma
Eläjiden lugu (2025)	37,350 ristitud
Pind	47 km²
Pämez'	Mihail Konev; (keväz'ku 2021—)
Telefonkod	+7−34 394-xx-xxx
Avtokod	66, 96, 196
Aigvö	UTC+5 (MSK+2)

Krasnoufimsk (ven.: Красноуфи́мск, tot.: Кызылъяр) om Venäman lidn Sverdlovskan agjan suvipäivlaskmas. Se om Krasnoufimskan lidnümbrikon administrativine keskuz da päpala. Mugažo lidn om Krasnoufimskan ümbrikon (edel 2006. vot — rajonan) administrativižeks keskuseks, om ümbärtud sil i ei mülü sihe.

Istorii

Eländpunktan aluz om pandud vl 1736 kuti kozakoiden Krasnii Jar-lidnuz («rusked kall'») baškiralaižiden londad vaste. Vl 1781 anttihe žilole makundan lidnan statusad nügüdläiženke nimenke. Krasnoufimsk oli da om järedan maižanduzrajonan keskuseks. Vspäi 1963 lidn alištub agjan tobmudele oikti.

Krasnoufimsk šingotase sauvondmaterialiden tehmižel (raudbetontegesed, gips, gravii), mecan ümbriradmižel (mebel', pilindmaterialad, parziden cilindruind) i sömtegimištol (dietproduktoiden tegim, maidtegim).

Geografijan andmused

Lidn otab lidnümbrikon päivnouzmašt pol't, sijadase ümbärdajan municipaližen ümbrikon keskuzpalan päivnouzmas, Uf-jogen oiktal korktal randal tobjimalaz (Kamanjogen hurapol'ne bassein), 210 m ü.m.t. keskmäižel korktusel.

«Kazan' — Jekaterinburg»-raudte läbitab lidnad. Matkad Jekaterinburghasai om 170 km päivnouzmha orhal, 195 km avtotedme vai raudtedme. Lähembaine lidn om Mihailovsk 85 km päivnouzmha orhal vai 101 km avtol.

Klimat om ven kontinentaline. Voden keskmäine lämuz om +2,1 C°, kezakun-elokun +15,4..+18,5 C°, tal'vkun-uhokun −12,5..−14,4 C°. Ekstremumad oma −53,6 C° (viluku) i +37,3 C° (kezaku, heinku, eloku). Kezaaigan minimum om −5,3 C° (kezaku), tal'vaigan maksimum om +7,5 C° (uhoku). Ei voi panda halad heinkus vaiše (minimum +0,8 C°). Paneb sadegid 565 mm vodes, enamba kezakus-elokus (66..71 mm kus), vähemba uhokus-keväz'kus (24..25 mm kus). Il'man keskmäine vozne relätivine nepsuz om 75 %, vajehtase kuidme 62 (semendku) — 83 (kül'mku) procentad röunoiš.

Tobmuz

Kaik nell' pen't žilod mülüdas lidnümbrikho Krasnoufimskan ližaks, ned sijadasoiš eriži läz kaks'kümnes kilometras suvipäivlaskmha orhal lidnaspäi: Pudlingovii (644 rist. vl 2010), Must Jogut (ven.: Чёрная Речка, 37 eläjad vl 2010), Poluhino i Žuravlinii Log («kur'giden van», molembad oliba kaikenaigaižeta ristitištota vl 2010). Lidnümbrikon pind — 127 km².

Lidnümbrikon tobmuden pämez' om sen Administracijan pämez'. Edeline lidnan Administracijan pämez' om Vadim Artemjevskih (keväz'ku 2012 — keväz'ku 2021). Lidnümbrikon Duman ezimez' om Rustam Gamaliev vn 2025 sulakuspäi. Edeližed lidnan Duman ezimehed oma Anatolii Hudäkov (kül'mku 2021 — sulaku 2025), Vladimir Bobrov (viluku 2017 — kül'mku 2021).

Eläjad

Vn 2010 Venäman rahvahanlugemižen mödhe lidnan eläjiden lugu oli 39 765 ristitud, lidnümbrikon — 40 445 ristitud, vn 2021 lidnan — 37 301 ristitud. Vl 2017 kaik 38 371 ristitud elihe lidnas i 39 304 ristitud kaikes lidnümbrikos. Kaikiš suremb lidnan ristitišt oli 44..46 tuhad eläjid vll 1989−2001 (46 100 eläjad vl 1992).

Rahvahad (ozutadud rahvahudenke vl 2010): venälaižed — 88,3 %, totarlaižed — 6,7 %, baškiralaižed — 1,6 %, toižed rahvahad — 3,4 %.

Ortodoksižen hristanuskondan kuz' pühäpertid^[1] oma kaičenus i saudud lidnas: Eläban Eziauguižen Stroican i ph. Aleksandr Nevalaižen päjumalanpertid, kaks' jumalanpertid i kaks' časounäd. Islaman «Al'-Hafiz»-mečet' om avaitud.

Openduz

Lapsiden opendusen aluzkundad oma ühesa nomeruidud päivkodid (nomer 3, 6, 7, 10, 14..16, 17 (koume adresad), 18 (kaks' adresad)), kaks' aluzškolad (nomer 4 i 7), nell' keskškolad (nomer 1, 2, 3, 9), lapsiden sädamižen pert'kulu, čomamahtoiden škol P. I. Osokinan nimed, lidnümbrikon sportškol.

Krasnoufimskan agrarine^[2], pedagogine^[3] kolledžad i äiprofil'ne tehnikum^[4], mugažo Uraližen raudtetehnikuman filial i Sverdlovskan agjan medicinižen kolledžan filial (molembad — Jekaterinburg) oma lidnan professionaližen opendusen aluzkundoikš.

Galerei

Medicinan istorijan muzei (2018, makundan läžundkodin istorine sauvuz)
Ph. Aleksandr Nevalaižen päjumalanpert', vn 2018 nägu
Lapsiden sädamižen pert'kulu (2018, makundan ohjandusen istorine sauvuz)
Krasnoufimsk-päraudtestancijan sauvuz vl 2011

Homaičendad

Irdkosketused

Krasnoufimsk Vikiaitas

	Sverdlovskan agjan lidnad
	Alapajevsk \| Alasald \| Alasergid \| Alatagil \| Alatur \| Aramil' \| Artömovskii \| Asbest \| Berözovskii \| Bogdanovič \| Degtärsk \| Irbit \| Ivdel' \| Jekaterinburg \| Kačkanar \| Kamensk Uralal \| Kamišlov \| Karpinsk \| Kirovgrad \| Krasnoturjinsk \| Krasnoufimsk \| Krasnoural'sk \| Kušv \| Lesnoi \| Mihailovsk \| Nevjansk \| Novoural'sk \| Pervoural'sk \| Polevskoi \| Rež \| Revd \| Serov \| Severoural'sk \| Sisert' \| Sredneural'sk \| Suhoi Log \| Zarečnii \| Talic \| Tavd \| Turinsk \| Uz' Läl' \| Verhoturje \| Volčansk \| Üläpišm \| Üläsald \| Ülätagil \| Ülätur

[1] Krasnoufimskan pühäpertid sobory.ru-saital. (ven.)

[2] Krasnoufimskan agrarižen kolledžan sait (agrokolledg.uralschool.ru). (ven.)

[3] Krasnoufimskan pedagogižen kolledžan sait (kpkollege.ru). (ven.)

[4] Krasnoufimskan äiprofil'žen tehnikuman sait (kmt66.ru). (ven.)

[1]

[2]

[3]

[4]