Suhoi Log (lidn)

Suhoi Log
Сухой Лог

Lidnanznam	Flag
Valdkund	Venäma
Eläjiden lugu (2025)	32,293 ristitud
Pind	30 km²
Pämez'	Roman Valov (kezaku 2017—)
Telefonkod	+7−34 373-xx-xxx
Avtokod	66, 96, 196
Aigvö	UTC+5 (MSK+2)

Suhoi Log (ven.: Сухо́й Лог) om Venäman lidn Sverdlovskan agjan suves. Se om municipaližen Suhoi Log-ümbrikon (edel 2025. vot — lidnümbrikon) administrativine keskuz, mülüb sihe. Edel 1996. vot kaks' municipališt ühtnikad oli: Suhoi Log-lidn i Suhoi Logan rajon.

Istorii

Eländpunktan aluz om pandud vl 1710 kuti Suholožskai-slabad (ven.: Сухоложская слобода), ümbärdajad küläd da žilod oma olmas 17. voz'sadan lopuspäi. Sauvondmaterialiden tegimed radaškanziba žilos 1930-nzil vozil. Vn 1943 uhokus anttihe radnikžilole lidnan statusad nügüdläiženke nimenke. Vspäi 1965 lidn om alištunu agjan tobmudele oikti.

Suhoi Log šingotase libutimiden tegimel (sildkranad), valamižtegimel (terasespäi, kaugedraudaspäi) i sauvondmaterialiden tegimištol (cement, leskusenvastaižed materialad, šifer, azbestcementtorved).

Geografijan andmused

Lidnan sijaduz agjas i valdkundas vn 2006 kartal

Municipaližen Suhoi Log-ümbrikon sijaduz agjas vn 2018 kartal

Lidn sijadase ümbrikon suviröunanno, Pišm-jogen oiktal randal tobjimalaz (ven.: Пышма́, Tur-jogen oiged ližajogi, Obin hurapol'ne bassein), 170 m ü.m.t. keskmäižel korktusel.

Matkad Jekaterinburghasai om 87 km päivlaskmha orhal, 106 km avtotedme vai raudtedme. Lähembaine lidn om Bogdanovič kümnes kilometras suvhe orhal, avtol i raudtel.

Kunar-raudtestancii (ven. Куна́ра) radab «Bogdanovič — Artömovskii»-keskustal.

Eläjad

Vn 2010 Venäman rahvahanlugemižen mödhe lidnan eläjiden lugu oli 34 554 ristitud, lidnan ümbrikon seičeme kümnendest, vn 2021 — 32 748 ristitud. Kaik 34 018 eläjad oli lidnas vl 2017. Kaikiš suremb lidnan ristitišt oli 36 800 eläjad vodel 1992.

Rahvahad (ozutadud rahvahudenke vl 2010): venälaižed — 94,8 %, totarlaižed — 1,6 %, toižed rahvahad — 3,6 %.

Ortodoksižen hristanuskondan Sündun Nägundan jumalanpert' om kaičenus vspäi 1865.

Openduz

Lapsiden opendusen aluzkundad oma kümne nimitadud i nomeruidud päivkodid (nomer 2, 3, 8, 29, 37..39, 42..44), nell' keskškolad (nomer 2, 5, 6, 7), gimnazii nomer 1, licei nomer 17, škol adaptiruidud programidenke, radajan norišton ehtal'ne škol nomer 1, ümbrikon ližaopendusen keskuz, muzikškol, čomamahtoiden škol V. A. Bunakovan nimed, ümbrikon sportškol.

Suhoi Logan äiprofil'ne tehnikum, Sverdlovskan agjan medicinižen kolledžan filial (Jekaterinburg) i Jekaterinburgan ekonomikan da tehnologijoiden kolledžan filial oma lidnan professionaližen opendusen aluzkundoikš.

Irdkosketused

• Municipaližen Suhoi Log-ümbrikon oficialine sait (goslog.ru). (ven.)
• Municipaližen Suhoi Log-ümbrikon Duman oficialine sait (duma.goslog.ru). (ven.)