Degtärsk

Degtärsk
Дегтярск

Lidnanznam	Flag
Valdkund	Venäma
Eläjiden lugu (2025)	14,831 ristitud
Pind	19 km²
Pämez'	Vadim Pil'nikov (reduku 2018—, Вадим Пильников)
Telefonkod	+7−34 397-xx-xxx
Avtokod	66, 96, 196
Aigvö	UTC+5 (MSK+2)

Degtärsk (ven.: Дегтя́рск, tot.: Дегтярск) om Venäman lidn da municipaline ümbrik (edel 2025. vot — lidnümbrik) Sverdlovskan agjan suvipäivlaskmas.

Istorii

Pordaigaližed sauvused oliba lidnan tahos 19. voz'sadaspäi varhapanemha hil't sijaližiš koivuišpäi Revdan tegimen täht da ajamha dögotid. Eländpunktan aluz om pandud vl 1914 kuti Degtärk-žilo (ven.: Дегтярка) samha vas'kkivendod (lopihe samišt vl 2010). Vn 1954 18. päiväl kül'mkud ühtištadihe Revdan Degtärk- (ven. Ревдинская Дегтярка) i Severskai Degtärk- (ven. Северская Дегтярка) žiloid da anttihe lidnan statusad nügüdläiženke nimenke. Vhesai 1997 lidn oli alištunu Revd-lidnan tobmudele.

Degtärsk šingotase mašiništonsauvomižen tegimel (fil'trad, avtoklavad, mülüd, lämudenvajehtuzladimed), «Cvetmetavtomatika»-tedoinstitutan tegimel i mouckiven ümbriradmižen tegimel, mugažo leibäntegim radab. Valamiž-metallurgine tegim seižub radmata.

Geografijan andmused

Degtärskan ümbrikon sijaduz agjas vn 2018 kartal

Lidn sijadase Keskmäižen Uralan päivlaskmaižil pautkil, 370 m ü.m.t. keskmäižel korktusel. Väzovk-jogi jokseb lidnan suves (ven.: Вязовка 19 km pitte, Čusovai-jogen hura ližajogi, Kamanjogen hurapol'ne bassein). Ikbulat-järv levineb lidnan pohjoižpäivnouzmaižel röunal.

Matkad Jekaterinburghasai om kaks'kümne kahesa kilometrad suvipäivnouzmha orhal vai 48 km avtotedme. Lähembaine lidn om Revd kümnes kilometras lodeheze orhal, avtol i raudtel.

Tobmuz

Kaik koume pen't žilod mülüdas ümbrikho Degtärskan ližaks: Berežok (45 rist. vl 2010, Čusovai i Väzovai kaikenaigaižeta ristitištota). Municipaližen ümbrikon pind — 167 km².

Ümbrikon tobmuden pämez' om sen Administracijan pämez'. Edeline Administracijan pämez' om Igor' Busahin, radoi vn 2018 redukuhusai. Degtärskan ümbrikon Duman ezimez' om Igor' Busahin vn 2021 kül'mkuspäi. Edeližed Duman ezimehed oma Ol'ga Hisamova (viluku 2018 — kül'mku 2021), Rašit Andaržanov (radoi vn 2018 vilukuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 15 522 ristitud, ümbrikon — 15 567 ristitud, vn 2021 lidnan — 15 497 ristitud. Vl 2017 kaik 16 141 ristitud elihe lidnas i 16 188 ristitud kaikes ümbrikos. Kaikiš suremb lidnan ristitišt oli 27 430 eläjad vodel 1959.

Rahvahad (ozutadud rahvahudenke vl 2010): venälaižed — 86,8 %, totarlaižed — 7,0 %, udmurtalaižed — 1,4 %, baškiralaižed — 1,3 %, toižed rahvahad — 3,5 %.

Ortodoksižen hristanuskondan kaks' pühäpertid oma saudud lidnas: ph. Jurgii-vägestusenkandajan puine jumalanpert' (om vspäi 2007) i ph. Dimitrii Solunalaižen časoun' (letihe vl 2005).

Openduz

Lapsiden opendusen aluzkundad oma seičeme nomeruidud päivkodid (nomer 1, 11, 16, 20, 24, 38, 49), koume keskškolad (nomer 16, 23, 30), ehtal'ne škol nomer 4, Degtärskan škol adaptiruidud programidenke (ende specialine korrekcine škol nomer 15), ližaopendusen Unikum-keskuz, čomamahtoiden škol, lapsiden da norišton sportškol, «Nor' tehnikanradai»-klub.

Lidnan professionaližen opendusen aluzkund om openduzkombinat. Toižed lähembaižed profopendusen aluzkundad sijadasoiš neniš lidnoiš: Revd, Pervoural'sk, Jekaterinburg.

Galerei

• 
  Lidnan i Ikbulat-järven nägu lendimespäi vn 2021 redukus. Volčihan vezivaradim om tagamal
• 
  Kalininan ird vn 2024 sügüz'kus
• 
  Lidnan kul'turkeskuz (2024)

Irdkosketused

• Degtärskan ümbrikon tobmuden sait (degtyarsk.ru). (ven.)
• Municipaližen ümbrikon Duman oficialine sait (duma-degtyarsk.ru). (ven.)