Revd (Sverdlovskan agj)

Revd
Ревда
Lidnanznam;	Flag;
Valdkund	Venäma
Eläjiden lugu (2025)	58,831 ristitud
Pind	111 km²
Pämez'	Tat'jana Klepikova; (viluku 2022—)
Telefonkod	+7−34 397-xx-xxx
Avtokod	66, 96, 196
Aigvö	UTC+5 (MSK+2)

Revd (ven.: Ревда́) om Venäman lidn da municipaline ümbrik (edel 2025. vot — lidnümbrik) Sverdlovskan agjan suvipäivlaskmas.

Istorii

Ende baškiralaižed oliba enambuses neniš tahoiš. Eländpunktan oficialine alusenpanendan dat om vn 1734 1. päiv sügüz'kud, konz Demidovan (lidnan muzei nimitase «Demidov-keskuz») tegim andoi ezmäšt kaugedraudad, nimitihe žilod jogen mödhe. Vl 1920 ezmäižed jonused ajaškanziba «Jekaterinburg — Kazan'»-raudtel, i vl 1925 saudihe Kapralovo-raudtestancijad žilos, vspäi 1963 stancii nimitase Revdaks. Vl 1929 kätihe radnikžilod lidnanvuiččeks. Vspäi 1931 ottas kävutamižhe sijališt vas'kkivendon löudmižsijad 15 km suvhe Revdaspäi. Vn 1935 3. päiväl semendkud anttihe žilole lidnan statusad. Vspäi 1963 Revd alištub agjan tobmudele oikti.

Revd šingotase Uralan kaivuzmetallurgižen kompanijan järedoil tegimil: Keskuralan vas'ksuladuztegim (vas'kkivendon küllästamine, vas'k, rikmuiktuz), Revdan mujumetalloiden ümbriradmižen tegim (vas'ktorved, bronz) i Revdan savičuntegim^[1], mugažo metallurgine tegim (terazvanutez), irdaližiden pidatimiden tegim i oluden tegim^[2] ratas.

Geografijan andmused

Lidn sijadase ümbrikon pohjoižes čogas, Keskmäižen Uralan päivlaskmaižil pautkil, 320 m ü.m.t. keskmäižel korktusel. Revd-jogi sädab vezivaradint-«uitod» i jokseb lidnan suves (ven.: Ревда́ 75 km pitte), se lankteb Čusovai-jogehe huralpäi (Kamanjogen hurapol'ne bassein), kudamb om lidnan päivnouzmaižeks röunaks.

E-22-avtomaršrut jagab lidnad poleti, pohjoižeks i suveks. Matkad Jekaterinburgan röunhasai om koumekümne kilometrad päivnouzmha orhal, 34 km avtotedme vai raudtedme; keskuzpalhasai — 43 km orhal vai 47 km avtotedme. Lähembaižed lidnad oma Pervoural'sk ani pohjoižhe i Degtärsk kümne kilometrad suvipäivnouzmha orhal, avtol i raudtel.

Tobmuz

Kaik seičeme pen't žilod mülüdas ümbrikho Revdan ližaks. Municipaližen ümbrikon pind — 944,99 km².

Revd-ümbrikon tobmuden pämez' om sen Administracijan pämez', edel vn 2017 vilukud Duman ezimez' oli ümbrikon pämehen. Edeline ümbrikon Administracijan pämez' om Irina Teiševa (tal'vku 2016 — viluku 2022). Municipaližen ümbrikon Duman ezimez' om Veniamin Tarov vn 2024 tal'vkuspäi. Edeline Duman ezimez' om Andrei Mokrecov (viluku 2017 — tal'vku 2024).

Eläjad

Vn 2010 Venäman rahvahanlugemižen mödhe lidnan eläjiden lugu oli 61 875 ristitud, ümbrikon — 63 368 ristitud, vn 2021 lidnan — 60 200 ristitud. Vl 2017 kaik 62 632 ristitud elihe lidnas i 64 291 ristitud kaikes lidnan ümbrikos. Kaikiš suremb lidnan ristitišt oli 65..66 tuhad eläjid vll 1986−2001 (66 100 eläjad vl 1992).

Rahvahad (ozutadud rahvahudenke vl 2010): venälaižed — 90,5 %, totarlaižed — 5,0 %, baškiralaižed — 1,0 %, toižed rahvahad — 3,5 %.

Ortodoksižen hristanuskondan nell' pühäpertid^[3] oma saudud lidnas: koume jumalanpertid i časoun'. Islaman pühäpert' om avaitud lidnas.

Openduz

Lapsiden opendusen aluzkundad oma kuz' nomeruidud päivkodid (nomer 2, 17, 34, 39, 46, 50 alajagusidenke), kümne keskškolad: kahesa lidnas (nomer 1, 2, 3, 7, 9, 10, 28, 29), kaks' žiloiš (nomer 13 i 22), gimnazii (nomer 25), evrogimnazii, ližaopendusen keskuz, lidnümbrikon sportškol, noriden tehnikanradajan stancii.

Professionaližen opendusen aluzkundad oma Revdan pedagogine kolledž^[4], Revdan äiprofil'ne tehnikum^[5] i Uralan valdkundaližen kolledžan Ivan Polzunovan nimed (Jekaterinburg) filial.

Galerei

Mikoi-arhangelan jumalanpert', vn 2016 nägu
Revdan mujumetalloiden ümbriradmižen tegimen kontor vl 2006
Revdan savičuntegim vl 2010
Revdan kodirandan istorijan «Demidov-Centr»-muzei (2007)
Revd-päraudtestancijan sauvused vl 2016

Homaičendad

↑ Revdan savičuntegimen sait (revkz.ru). (ven.)
↑ Revdan oludentegimen sait (revdabeer.ru). (ven.)
↑ Revdan pühäpertid sobory.ru-saital. (ven.)
↑ Revdan pedagogižen kolledžan sait (rgpk-revda.profiedu.ru). (ven.)
↑ Revdan äiprofil'žen tehnikuman sait (rmt96.ru). (ven.)

Irdkosketused

Municipaližen Revd-ümbrikon tobmuden sait (admrevda.ru). (ven.)

Revd (Sverdlovskan agj) Vikiaitas

	Sverdlovskan agjan lidnad
	Alapajevsk \| Alasald \| Alasergid \| Alatagil \| Alatur \| Aramil' \| Artömovskii \| Asbest \| Berözovskii \| Bogdanovič \| Degtärsk \| Irbit \| Ivdel' \| Jekaterinburg \| Kačkanar \| Kamensk Uralal \| Kamišlov \| Karpinsk \| Kirovgrad \| Krasnoturjinsk \| Krasnoufimsk \| Krasnoural'sk \| Kušv \| Lesnoi \| Mihailovsk \| Nevjansk \| Novoural'sk \| Pervoural'sk \| Polevskoi \| Rež \| Revd \| Serov \| Severoural'sk \| Sisert' \| Sredneural'sk \| Suhoi Log \| Zarečnii \| Talic \| Tavd \| Turinsk \| Uz' Läl' \| Verhoturje \| Volčansk \| Üläpišm \| Üläsald \| Ülätagil \| Ülätur

[1] Revdan savičuntegimen sait (revkz.ru). (ven.)

[2] Revdan oludentegimen sait (revdabeer.ru). (ven.)

[3] Revdan pühäpertid sobory.ru-saital. (ven.)

[4] Revdan pedagogižen kolledžan sait (rgpk-revda.profiedu.ru). (ven.)

[5] Revdan äiprofil'žen tehnikuman sait (rmt96.ru). (ven.)

[1]

[2]

[3]

[4]

[5]