Nevjansk

Nevjansk
Невьянск

Lidnanznam	Flag
Valdkund	Venäma
Eläjiden lugu (2025)	22,079 ristitud
Pind	39,13 km²
Pämez'	Aleksandr Berčuk (keväz'ku 2017—)
Telefonkod	+7−34 356-xx-xxx
Avtokod	66, 96, 196
Aigvö	UTC+5 (MSK+2)

Lidnan nägu Man kaimdajaspäi aigemba mi 2006. voz'

Nevjansk (ven.: Невья́нск) om Venäman lidn Sverdlovskan agjan suvipäivlaskmas. Se om Nevjanskan ümbrikon (edel 2025. vot lidnümbrikon, edel 2006. vot — rajonan) administrativižeks keskuseks da palaks.

Istorii

Eländpunktan aluz om pandud Petr I-carin käskön mödhe vl 1701 kuti Nevjan Tegim-žilo (ven.: посёлок Невьянский Завод) tehmaha raudad, nimitihe jogen mödhe. Vspäi 1878 raudtestancii om saudud. Žilo sai lidnan statusad vl 1919. Vspäi 1963 alištub agjan tobmudele oikti.

Nevjansk šingotase mašiništonsauvomižen tegimel (edel 1904. vot metallurgine; hangoikahad GEKA-kormadimed, kompressorstancijad, varapalad burauduzmašiništon täht), sauvondmaterialiden pästandal (kuivsegoitused), torviden polimerizoläcijan edheotandal i trikotažfabrikal.

Geografijan andmused

Nevjanskan municipaline ümbrik agjas vn 2018 kartal

Lidn sijadase municipaližen ümbrikon lodehes, Neiv- (Nevj) jogen üläjoksmusen randal (ven.: Не́йва vai endevanh Не́вья 294 km pitte, Turan oigedpol'ne bassein, Obin hurapol'ne bassein), Keskmäižen Uralan pautkidenno, 240 m ü.m.t. keskmäižel korktusel. Nevjan uiton (7,72 km²) padosein om saudud metallurgižen tegimen täht vl 1700, uit otab lidnan suvipäivnouzmad i om vezivaradimeks.

Matkad Jekaterinburghasai om seičemekümne nell' kilometrad suvhe avtotedme vai 99 km raudtedme. Nevjansk om Jekaterinburg — Alatagil keskustal, matkad Alatagilhasai om 50 km pohjoižhe, sidä kesken «Malind»-kiruhjonusel. Lähembaižed lidnad oma Kirovgrad kümnes kilometras suvipäivlaskmha Nevjanskan ümbrikon Cementnii-žilonke da sen cementtegimenke pol'tel, Ülätagil 20 km suvipäivlaskmha i Novoural'sk 30 km suvhe.

Eläjad

Vn 2010 Venäman rahvahanlugemižen mödhe lidnan eläjiden lugu oli 24 567 ristitud, lidnümbrikon viž ühesandest, vn 2021 lidnan — 22 061 ristitud. Kaik 23 348 eläjad oli lidnas vl 2017. Kaikiš suremb lidnan ristitišt oli 32 361 eläjad vl 1979.

Ortodoksižen hristanuskondan seičeme pühäpertid oma avaitud lidnas: Spasan Toižetamižen päjumalanpert' (om saudud 1824−1826), nell' jumalanpertid i kaks' časounäd. Päjumalanpert' i värištui čuhunduz (1732) oma kaikiš znamasižembad amuižed sauvused. Lidn om Vanhuskolaižiden jumalaižiden pirdandan keskuseks.

Openduz

Lapsiden opendusen aluzkundad oma kuz' nimitadud i nomeruidud päivkodid (nomer 1, 6 (koume adresad), 12 (kaks' adresad), 13, 36, 44 (kaks' adresad)), kuz' keskškolad (nomer 1..6), ümbrikon ehtal'ne škol, ümbrikon sädamižen keskuz, muzikškol, čomamahtoine škol, ümbrikon sportškol.

Uralan kaivuztegimiden kolledž Demidovoiden nimed om lidnan professionaližen opendusen aluzkundaks.

Galerei

• 
  Lidnan administracijan sauvuz (2013)
• 
  Spasan Toižetamižen päjumalanpert', värištui čuhunduz i muštnik Petr I-imperatorale, vn 2012 nägu
• 
  Nevjanskan mašiništonsauvomižen tegimen kontor vl 2021
• 
  Mašinansauvojiden kul'turkeskuz sadus (2011)
• 
  Nevjansk-päraudtestancijan i avtostancijan sauvuz vl 2011

Irdkosketused

• Municipaližen ümbrikon Duman oficialine sait (duma-nevyansk.ru). (ven.)
• Lidnan da sen ümbrikon Administracijan oficialine sait (nevyansk66.ru). (ven.)