Aramil'

Aramil'
Арамиль

Lidnanznam	Flag
Valdkund	Venäma
Eläjiden lugu (2023)	19,805 ristitud
Pind	21,82 km²
Pämez'	Marina Mišarina (heinku 2022—)
Telefonkod	+7−34 374-xx-xxx
Avtokod	66, 96, 196
Aigvö	UTC+5 (MSK+2)

Aramilin lidnümbrikon sijaduz agjan kartal (2018)

Aramil' (ven.: Арами́ль) om Venäman lidn Sverdlovskan agjan suves, Jekaterinburgan suvipäivnouzmaine kaimdailidn. Se om Aramilin lidnümbrikon administrativine keskuz.

Istorii

Eländpunktan aluz om pandud vl 1675 kuti Venäman lidnuz baškiralaižiden maiden röunanno i Aramilin slabad, nimitihe jogen mödhe. Slabadan ristitišt oli otnus raudan samižhe. Järed vatefabrik oli olmas 19. voz'sadan keskespäi, tetihe sen polhe verhiš maiš. Kätihe radnikžiloks vn 1938 4. redukud. Žilo sai lidnan statusad vn 1966 15. päiväl sügüz'kud.

Aramilin edheotandad da tegimed mülüdas nenihe sarakoihe: sauvondmaterialoiden pästand (raudbeton), himine sarak (plastmassad da plastikpakuitez), mašinoidensauvomine (lendimiden kohenduz), metallan ümbriradmine (henod metalltuhkad), sömtegimišt.

Geografijan andmused

Lidn sijadase Iset'-jogen randoil, 220 m ü.m.t. keskmäižel korktusel. Aramilk-jogi (ven.: Арамилка 32 km pitte) lankteb sihe oiktalpäi lidnan territorijal.

Jekaterinburgan Kol'covo-lendimport radab nelläs kilometras päivnouzmha avtotedme. Aramil' -raudtestancii om saudud vides kilometras päivnouzmha lidnalpäi.

Tobmuz

Aramil'-žilo (1985 rist. vl 2010) i Svetlii-žilo (1237 rist. vl 2010) mülüdas lidnümbrikho Aramil'-lidnan ližaks. Lidnümbrikon pind om 21,82 nellikkilometrad.

Lidnümbrikon tobmuden pämez' om sen Administracijan pämez'. Edeližed lidnümbrikon pämehed oma Vitalii Nikitenko (heinku 2017 — heinku 2022), Vladimir Gerasimenko (reduku 2012 — kezaku 2017). Lidnümbrikon Duman ezimez' om Tat'jana Pervuhina vn 2021 redukuspäi. Edeline Duman ezimez' om Svetlana Mezenova (viluku 2017 — reduku 2021).

Eläjad

Vn 2010 Venäman rahvahanlugemižen mödhe lidnan eläjiden lugu oli 14 224 ristitud, lidnümbrikon — 17 446 ristitud. Vn 2021 rahvahanlugemižen mödhe lidnan ristitišt oli 19 013 eläjad, lidnümbrikon — 22 300 eläjad. Vl 2017 kaik 15 162 ristitud elihe lidnas i 18 379 eläjad oli kaikes lidnümbrikos. Vll 1996−2020 lidnan ristitišt vajehtihe 14..15 tuhad röunoiš. Kaikiš suremb lidnan ristitišt om nügüd'.

Rahvahad (enamba 1,0 % vl 2010, ozutadud rahvahudenke): venälaižed — 90,3 %, totarlaižed — 2,1 %, udmurtalaižed — 1,3 %, armenijalaižed — 1,0 %, toižed rahvahad — 5,3 %.

Ortodoksižen hristanuskondan Eläban Eziauguižen Stroican jumalanpert' om saudud lidnas (letihe vll 1830−1842), toine Nell'kümnen moknikan jumalanpert' om sauvomas vspäi 2019. Islaman «As-Saläm»-pühäpert' om avaitud lidnas.

Lapsiden opendusen aluzkundad oma severz'-se päivkodid, koume keskškolad (nomer 1, 3, 4), čomamahtoiden škol, «Del'fin»-sportškol. Professionaližen opendusen aluzkund om Jekaterinburgan saraktehnologijoiden da servisan tehnikuman filial Aramiliš.

Galerei

• 
  Lidnan administracijan sauvuz (2012)
• 
  Eläban Eziauguižen Stroican jumalanpert', vn 2012 nägu
• 
  Istorižen vatefabrikan päkorpus vl 2012
• 
  Kul'turkeskuz (2012)
• 
  Jogentagaine Aramil' i jogen pind vl 2013

Irdkosketused

• Aramilin lidnümbrikon tobmuden aluzkundoiden oficialine sait (aramilgo.ru). (ven.)
• Aramilin lidnümbrik Sverdlovskan agjan oficialižel midural.ru-saital. (ven.)