Budapešt

Vikipedii-späi
Budapešt
Budapest
 Lidnanznam
 Flag
Valdkund Mad'jaranma
Eläjiden lugu (2017) 1,706,851 ristitud
Pind 525,14 km²
Budapešt Budapest
Pämez' Gergei Karačon'
(reduku 2019—,
Gergely Karácsony)
Telefonkod +36−1
Aigvö tal'vel UTC+1,
kezal UTC+2


Budapeštan transportkart ezilidnoidenke

Budapešt (mad'j.: Budapest [ˈbudɒpɛʃt]) om Mad'jaranman pälidn da kaikiš suremb lidn. Se om Keskmad'jaranman provincijan administrativine keskuz, mülüb provincijha subregionaks.

Budapešt om Mad'jaranman biznesan, opendusen, kul'turan da tedon keskuz.

Istorii[vajehta | vajehtada tekst]

Sätihe eländpunktad koumen lidnan ühtištusel vn 1873 kül'mkun 17. päiväl Mad'jaranman erigoittud ohjastusen alusenpanendan jäl'ghe. Nene koume lidnad oliba: Pešt Dunain hural (päivnouzmaižel) randal, Bud (madj. Buda) da Obud (madj. Obuda) Dunain oiktal randal. Bud oli Mad'jaranman kunigahusen pälidnaks vozil 1361−1541.

Toižen mail'man sodan aigan lidn oli okkupuruidud Saksanman sodavägil vozil 1944 (keväz'ku) — 1945 (13. uhoku, NSTÜ:n armijan šturm). Udessündutihe lidnad 1950-60-nzil vozil.

Geografižed andmused[vajehta | vajehtada tekst]

Lidn sijadase valdkundan keskuzpalan pohjoižes, 96..527 m ü.m.t. korktusil. Dunai-jogi jagab lidnad kahteks palaks: tazo Pešt da kukhikaz vihand Bud. Jogen hijamad ümbärtas seičeme sar't lidnan röunoiš.

Klimat om subtropine venon kontinentaližen röunal. Voden keskmäine lämuz om +12,6 C°, kezakun-elokun +21,4..+23,3 C°, tal'vkun-uhokun +1,4..+3,4 C°. Ekstremumad oma −25,6 C° (viluku) i +40,7 C° (heinku). Kezaaigan minimum om +3 C° (kezaku), tal'vaigan maksimum om +19,7 C° (uhoku). Voib panda halad semendkus i sügüz'kus. Paneb sadegid 532 mm vodes, tazomäras vodes läbi, enamba semendkus-kezakus (62..63 mm kus), vähemba uhokus-keväz'kus (29..30 mm kus). Kun keskmäine relätivine nepsuz vajehtase 59..61 % röunoiš sulakus-elokus i 74..80 % kül'mkus-uhokus. Kezaaig om päivoikaz, tal'v om pil'vesekaz.

Tobmuz[vajehta | vajehtada tekst]

Lidnan ümbrikod (nomeruidud, 2006)

Budapešt jagase 23 lidnümbrikoks, kaikutte om ičeze nimenke.

Edeline lidnan pämez' om Ištvan Tarloš (István Tarlós, reduku 2010 — reduku 2019).

Eläjad[vajehta | vajehtada tekst]

Kaik 1 702 297 ristitud elihe lidnas vl 2008 (Bud: 480 756, Pešt: 1 221 541). Vodel 2014 lidnan eläjiden lugu oli 1 744 665 ristitud. Kaikiš suremb lidnan ristitišt oli 2 059 226 eläjad vl 1980. Läz koumed millionad ristituid elädas lidnaglomeracijas 2538 km² pindal.

Vn 2001 rahvahanlugemižen mödhe eläjiden znamasine enambuz oli mad'jaralaižed (91,7 %).

Kaik 35 üläopendusen aluzkundad ratas Budapeštas, niiden kesken 17 universitetad. Kaikiš znamasižembad oma Budapeštan universitet Lorand Etvöšan nimed[1] (mad'j.: Eötvös Loránd Tudományegyetem, alusenpanend 1635, 27 tuh. üläopenikoid) i Budapeštan tehnologijan da ekonomikan universitet[2] (mad'j.: Budapesti Műszaki és Gazdaságtudományi Egyetem, alusenpanend 1782, 20 tuh. üläopenikoid vl 2019).

Transport[vajehta | vajehtada tekst]

Mad'jaranman pälidn om valdkundan avtotesol'meks. Avtobusad (264 maršrutad), trolleibusad (15 maršrutad), tramvaid (33 jonod), elektrojonused (viž jonod) da funikulör oma kundaližeks transportaks Budapeštas. Koume päraudtestancijad om lidnas. Metro radab lidnas vspäi 1896 (vspäi 2014 nell' jonod, 52 stancijad, 39,4 km raudted). Jogitaksid oma populärižed (nell' maršrutad).

Rahvahidenkeskeine civiline Budapešt-lendimport Ferenc Listan nimed[3] (ende Ferihed', mad'j.: Budapest Liszt Ferenc Nemzetközi Repülőtér, BUD / LHBP, 16,1 mln passažiroid vl 2019 i 194 tuh. tonnoid jüguid vl 2022) sijadase 16 km suvipäivnouzmha lidnan keskusespäi. Sišpäi tehtas reisid äjihe Evropan i Päivlaskmaižen Azijan lendimportoihe, čarterreisid — ližaks Evropan edahaižihe sarihe i Päivnouzmaižen Azijan maihe.

Homaičendad[vajehta | vajehtada tekst]

  1. Universitetan Lorand Etvöšan nimed sait (elte.hu). (mad'j.) (angl.)
  2. Budapeštan tehnologijan da ekonomikan universitetan sait (bme.hu). (mad'j.) (angl.)
  3. Rahvahidenkeskeižen Budapešt-lendimportan sait (bud.hu). (mad'j.) (angl.)

Irdkosketused[vajehta | vajehtada tekst]



Mad'jaranman agjad da niiden administrativižed keskused
Bač-Kiškun (Kečkemet) | Baran'j (Peč) | Bekeš (Bekeš'čab) | Boršod-Abaui-Zemplen (Miškol'c) | Čongrad-Čanad (Seged) | D'jor-Mošon-Šopron (D'jor) | Fejer (Sekešfehervar) | Haidu-Bihar (Debrecen) | Heveš (Eger) | Jas-Nad'kun-Sol'nok (Sol'nok) | Komarom-Estergom (Tataban'j) | Nograd (Šal'gotarjan) | Pešt (Budapešt) | Sabol'č-Satmar-Bereg (N'jired'haz) | Šomod' (Kapošvar) | Zal (Zalaegerseg) | Tol'n (Seksard) | Vaš (Sombathei) | Vesprem (Vesprem-lidn)
tazostadud agjaha lidn — Budapešt


Evropan pälidnad
Afinad | Amsterdam | Andorr la Vel'j | Baku | Belgrad | Berlin | Bern | Bratislav | Brüssel' | Budapešt | Buharest | Dublin | Hel'sinki | Jerevan | Kijev | Kišinöv | Kopenhagen | Lissabon | London | Lüblän | Lüksemburg-lidn | Madrid | Minsk | Monako-lidn | Moskv | Nikosii | Oslo | Pariž | Podgoric | Prag | Reikjavik | Rig | Rim | San Marino-lidn | Sarajevo | Skopje | Sofii | Stokhol'm | Zagreb | Tallidn | Tbilis | Tiran-lidn | Vaduc | Vallett | Varšav | Vatikan | Ven | Vil'nüs