Ähtäri

Ähtäri (veps. i suom.)
Etseri (roč.)
	Lidnanznam;
Valdkund	Suomenma
Eläjiden lugu (2020-01-01)	5,608 ristitud
Pind	910,88 km²
Pämez'	Jarmo Pienimäki; (keväz'ku 2012—)
Telefonkod	+358-
Aigvö	tal'vel UTC+2,; kezal UTC+3

Ähtäri (mugažo suomen kelel, erasti Ätsäri; roč.: Etseri) om Suomenman lidn da lidnankund valdkundan keskuzpalan suvipäivlaskmas. Se om Suvipohjanma-agjan kaikiš penemb lidn da municipalitet kahesaspäi eläjiden lugun mödhe.

Istorii

Municipalitetan aluz om pandud vl 1867. Raudte tuli Ähtärihe 1880-nzil vozil. Se sai lidnan statusad vl 1986.

Ähtäri šingotase metalližiden mülüiden pästandal tegimišton täht («Tankki Oy»), venehiden tehmižel («Inhan tehtaat Oy Ab», «Terhitec Oy»), armiruidud plastikuksiden «Muovilami Oy»-edheotandal i asfal'tkrepindoiden «Katutekno Oy»-kompanijal. Zoopark, astronomine observatorii i «Mesikämmen»-adivpert' ratas lidnas mugažo.

Geografijan andmused

Lidn sijadase agjan suvipäivnouzmaižes čogas, keskuzfartalad oma Ouluvezi-järven pohjoižrandoil (suom.: Ouluvesi 4 km² pindal, 140 m ü.m.t.). Ähtärinjärv (suom. Ähtärinjärvi 45 km² pindal, 153 m ü.m.t.) om pohjoižpoles, zavodiše 5 km pohjoižpäivnouzmha lidnankundan keskusespäi. Matkad lidnaspäi agjan Seinjogi-keskushesai om 68 km päivlaskmha-lodeheze orhal, 84 km avtol vai raudtel, Hel'sinki-pälidnhasai — 269 km suvhe orhal, 326 km avtotedme vai raudtedme. Lähembaižed lidnad (avtoteidme) oma Virrat (Pirkanma) 41 km suvhe-suvipäivlaskmha i Alavus 30 km päivlaskmha. Raudtestancii radab «Seinjogi — Haapamäki»-keskustal.

Vl 2020 lidnan ühthine pind — 910,88 km², sidä kesken kuivma 805,83 km², vezi da sokaz tahond ottas 105,05 nellikkilometrad (6 järved).

Kaik 10 keskusen rajonad i 17 küläd mülüdas lidnankundha.

Eläjad

Vl 1980 eläjiden lugu oli 7 458 ristitud, vl 2010 — 6 482 ristitud. Kaikiš suremb ristitišt oli 8 507 eläjad vl 1950 i 7 826 eläjad vl 1985. Kaks' ristitud koumespäi elädas lidnankundan keskuses.

Kodikelen mödhe (2016): suomen kel' — 98,9%, ročin kel' — 0,1%, toižed keled — 1,0%.