Kauhav

Kauhav
Kauhava (suom. i roč.)
	Lidnanznam;
Valdkund	Suomenma
Eläjiden lugu (2020-01-01)	15,716 ristitud
Pind	1,328,38 km²
Pämez'	Markku Lumio; (viluku 2015—)
Telefonkod	+358-
Aigvö	tal'vel UTC+2,; kezal UTC+3

Kauhav (suom. i roč.: Kauhava) om Suomenman lidn da lidnankund valdkundan päivlaskmas. Se om Suvipohjanma-agjan koumanz' lidnankund kahesaspäi eläjiden lugun mödhe.

Istorii[redaktiruida | redaktiruida purde]

Ezmäižed küläd nügüdläižen lidnankundan territorijal mainitasoiš 16. voz'sadaspäi. Municipalitetan aluz om pandud vl 1867, nimitihe jogen mödhe ezimeletaden. Kund sai lidnan statusad vl 1986. Vspäi 2009 enččed Alahärmä, Ülihärmä i Kortesjärvi-municipalitetad mülüdas lidnankundha.

Kauhav šingotase mašinansauvomižel («MSK Group», «Lillbacka Powerco Oy» da toižed), sauvondmaterialiden pästandal (iknad, uksed — «Skaala IFN Oy»), meblin edheotandal («Unico Finland Oy») i puukko-veičiden fabrikal («Iisakki Järvenpää Oy» vspäi 1879, ende oli viž edheotandad). «Powerpark»-bobuštuzkeskuz kartingan trassanke ratas lidnas. Veičiden jogavozne rahvahidenkeskeine festival' mäneb kezakus. Lihaživatvodind i hernhen kazvatand oma lidnankundas.

Geografijan andmused[redaktiruida | redaktiruida purde]

Lidn sijadase agjan pohjoižes, Kauhavanjogen randoil (suom.: Kauhavanjoki 40 km pitte, Lapuanjogen oiged ližajogi). Matkad lidnaspäi agjan Seinjogi-keskushesai om 37 km suvhe avtotedme vai raudtedme, Hel'sinkihesai om 340 km suvhe-suvipäivnouzmha orhal, 396 km avtol vai raudtel. Lähembaine lidn om Lapua 17 km suvhe avtol vai jonusel.

Vl 2020 lidnan ühthine pind — 1 328,38 km², sidä kesken kuivma 1 313,79 km², vezi i sokaz tahond otiba 14,59 nellikkilometrad.

Eläjad[redaktiruida | redaktiruida purde]

Vl 1980 lidnankundan eläjiden lugu oli 19 924 ristitud, vl 2010 — 17 308 ristitud. Kaikiš suremb ristitišt oli 20 359 eläjad vl 1985. Ristituiden kaks' videndest eläb lidnankundan keskuses.

Mamankelen mödhe (2016): suomen kel' — 96,7%, ročin kel' — 0,6%, toižed keled — 2,7%.

Harri Mattila radoi edeližeks lidnanpämeheks (2009−2014).