Mustmägi

Mustmägi
Црна Гора / Crna Gora
Flag;	Valdkundznam;
Pälidn	Podgoric
Eläjiden lugu (2018)	614,249 ristitud
Pind	13,812 km²
Kel'	mustmägin
Valdkundan pämez'	Milo Džukanovič
Päministr	Duško Markovič
Religii	hristanuskond, islam
Valüt	evro (€) (EUR)
Internet-domen	.me
Telefonkod	+382
Aigvö	tal'vel UTC+1,; kezal UTC+2

Mustmägi, Černogorii vai Montenegro (mustm.: Црна Гора, Crna Gora [t͡sŗːnaː ɡǒra], nece om täuz' oficialine nimituz), om tazovaldkund Evropan suvipäivnouzmpoles, Balkanan pol'saren Adriatižel randištol. Pälidn da kaikiš suremb lidn om Podgoric.

Vspäi 2010 valdkund om kandidatan kändamha EÜ:n ühtnijaks. Vspäi 2017 om PAKO:n ühtnijan.

Istorii

Vn 2006 3. päiväl kezakud Mustmägi tedištoiti ripmatomudes Serbijan da Mustmägin Konfederacijaspäi referenduman satusiden mödhe.

Tazovaldkundan edeližed Konstitucijad (mustm.: Ustav Crne Gore) oliba vahvištadud vozil 1905, 1992 i 2006. Valdkundan nellänz' lugul Konstitucii^[4]^[5] om olmas vn 2007 redukun 20. päiväspäi, se om väges vn 2013 kohendusidenke.

Istorine da kul'turine pälidn om Cetine.

Geografijan andmused

Mustmägi om mavaldkundröunoiš Horvatijanke päivlaskmas (röunan piduz — 14 km), Bosnijan da Gercegovinanke lodehes (225 km), Serbijanke pohjoižpäivnouzmas da Kosovonke^[6] suvipäivnouzmas (ühtes 203 km), Albanijanke suves (172 km). Ühthine röunoiden piduz om 614 km.

Mustmägin suvipäivlaskmaižed randad lainištab Adriatine meri. Randanpird om 293,5 km^[7].

Valdkundan kaikiš korktemb čokkoim om Zla Kolat-mägenoc, 2534 m valdmeren pindan päl.

Saum vezid — 1,5 %. Kaikiš suremb järv om Skadar Albanijan röunal.

Londuseližed pävarad oma boksitad, raudkivend, kivihil'.

Politine sistem

Ohjandusen form om unitarine parlamentine tazovaldkund. Valdkundan pämez' om prezident (mustm.: Predsjednik Crne Gore), kaik rahvaz valičeb händast videks vodeks. Prezidental om kahtenden strokun voimust.

Mustmägin parlament (mustm.: Skupština Crne Gore) om üks'kodine, se mülütab 81 ühtnijad: 76 heišpäi valitas kaikel rahvahal i viž ezitajad albanižes rahvahanvähembusespäi, kaik hö ratas nell' vot.

Radonoigendai tobmuz om Mustmägin ohjastuz (mustm.: Vlada Crne Gore), parlament vahvištab sen mülükundan prezidentan taričendan mödhe.

Käskuzkundaline tobmuz om kaks'pordhikaz. Mustmägin Ülembaine Käskuzkund ühtenzoitab käskusiden kävutandan kaikel valdkundan territorijal.

Nügüdläine Milo Džukanovič-prezident radab vn 2018 semendkun 20. päiväspäi (vll 2008−2010 i 2013−2016 radoi Mustmägin päministran). Duško Markovič om päministran vn 2016 kül'mkun 28. päiväspäi. Parlamentan ühtnijoiden järgenduseližed valičendad oliba vn 2016 16. päiväl redukud.

Administrativiž-territorialine jagand

Kacu kirjutuz: Mustmägin administrativiž-territorialine jagand.

Mustmägi jagase kaks'kümneks ühteks municipalitetaks (mustm.: opština) da sen ližaks kahteks lidnümbrikoks Podgorican südäimes.

Eläjad

Mustmägiš elädas mustmägilaižed. Vl 2011 valdkundan eläjiden lugu oli 625,266 ristitud^[8], se oli kaikiš suremb ristitišt.

Rahvahad (2011): mustmägilaižed — 45,0 %, serbalaižed — 28,7 %, bošnäklaižed — 8,7 %, albanijalaižed — 4,9 %, slavilaižed-islamanuskojad — 3,3 %, čiganalaižed — 1,0 %, horvatijalaižed — 1,0 %, toižed rahvahad — 2,5 %, rahvahuden ozutandata — 4,9 %.

Kodikelen mödhe (2011): serban kel' — 42,9 %, mustmägin kel' — 37,0 %, bosnijan kel' — 5,3 %, albanijan kel' — 5,3 %, serbanhorvatan kel' — 2,0 %, toižed keled — 3,5 %, märhapanendata — 4,0 %.

Uskondan mödhe (2011): ortodoksižed hristanuskojad — 72,1 %, islamanuskojad — 19,1 %, katolikad — 3,4 %, ateistad — 1,2 %, toižed uskojad — 1,5 %, märhapanendata — 2,7 %.

Mustmägin toižed järedad lidnad (enamba 20 tuh. ristituid vn 2003 rahvahanlugemižen mödhe, surembaspäi penembha): Nikšič, Plevl'. Lidnalaižiden pala om 67,5 % (2020).

Ižanduz

Mustmägi om šingotai agrariž-industrialine ma, rippub irdpol'žes torguindaspäi lujas märas. Vl 2023 valdkundan nominaline kogosüdäiprodukt oli US$7,06 mlrd. ekvivalentas (158. sija mail'mas; US$11,338 ühtele hengele, 79. sija) vai US$17,43 mlrd. tazostadud ostmižmahtusen mödhe (152. sija; US$28,002 ühtele hengele, 68. sija). Ekonomikan välläd poled oma torhuden mairiž, radajiden vajaguz, znamasine korrupcii. Ristitišton koumandez eläb gollüden röunal kacmata korktaha opendusenmärha. Ižandusen päsarakod oma turizm, metallurgii (terasen i alüminijan tehmine), maižanduzprodukcijan ümbriradmine söndtavaroikš, kulutajiden erazvuiččiden tavaroiden pästand. Finansine voz' zavodiše 1. vilukud.

Kogosüdäiproduktan palad (2016): maižanduz 7,5 %, tegimišt 15,9 %, holitišiden sfer 76,6 %. Radajiden järgenduz sektoroidme (vn 2017 andmused): maižanduz 7,9 %, tegimišt 17,1 %, holitišiden sfer 75,0 %.

Valdkundan päeksport om vas'kkivend, alüminii, teraraudad, elektruz, pakuidud zelläd, pumaterialad. Importan tavarad oma ümbriratud kivivoi, avtod, lebuvenehed, pakuidud zelläd, tabaktegesed. Vl 2021 import ületi eksportad läz pol'toštha kerdha. Irdpol'žen torguindan päižed partnörad (2021) oma Serbii (Mustmägin eksportan 15,7 % i importan 25,7 %), Ispanii (Mustmägin eksportan 11,3 %), Bosnii da Gercegovin (eksportan 4,8 % i importan 6,2 %), Grekanma (importan 9,5 %), Pakistan (eksportan 9,4 %), Saksanma (eksportan 4,7 % i importan 4,3 %), Italii (eksportan 4,1 % i importan 4,9 %), Šveicarii (eksportan 7,6 %), Horvatii (importan 7,4 %), Kitai (importan 7,1 %), Turkanma (eksportan 3,7 % i importan 3,3 %), Suvikorei (eksportan 5,7 %).

Galerei

Sinivauvaz pert'kulu (Плави дворац) om valdkundan Prezidentan oficialižeks rezidencijaks, istorine Cetine-pälidn, eloku 2005
Mustmägin parlamentan ištundoiden sija, Podgoric, reduku 2012
Ristitvaroiden ohjandusen agentuz (Uprava za Kadrove, UZK, Podgoric, tal'vku 2015) ohjastab reformoid valdkundas
Mustmägin Keskuzbank (Centralna Banka Crne Gore, CBCG), Podgoric, heinku 2022
Mustmägin Nacionaline kirjišt (Nacionalna biblioteka Crne Gore "Đurđe Crnojević"), Cetine, viluku 2012, ende Italijan sur'oigenduzkundan sauvuz

Homaičendad

↑ Mustmägin ristitišton lugun endustuz vn 2018 heinkus. // Mail'man faktoiden kirj. — Cia.gov. (angl.)
↑ De facto. Formaližikš valdkund eile evron zonan ühtnijan.
↑ Mugažo .yu kuti enzne Jugoslavijan valdkund-ühtnii.
↑ Mustmägin Konstitucii parlamentan oficialižel saital (skupstina.me). (mustm.)
↑ Mustmägin Konstitucijan tekst constituteproject.org-saital. (angl.)
↑ Mustmägi tundišti Kosovon ripmatomut. — Lenta.ru. (ven.)
↑ Гора у бројкама (Mustmägin polhe luguil). — Завод за статистику Црне Горе (Mustmägin statistikan radnikoičend, monstat.org), 2008. (mustm.)
↑ Prvi rezultati, Popis stanovništva, domaćinstava i stanova u Crnoj Gori 2011 (Mustmägin ezmäižen rahvahanlugemižen rezul'tatad vl 2011). — Zavod za statistiku Crne Gore (monstat.org). (mustm.)

Irdkosketused

Mustmägin ohjastusen oficialine sait (vlada.me). (mustm.) (angl.)
Mustmägin parlamentan oficialine sait (skupstina.me). (mustm.) (angl.)
Mustmägi-valdkundan oficialine sait (gov.me). (mustm.) (angl.)

Mustmägi Vikiaitas

	Evropan valdkundad
	Evropan valdkundad Alamad \| Albanii \| Andorr \| Armenii¹ \| Azerbaidžan¹ \| Avstrii \| Bel'gii \| Bolgarii \| Bosnii da Gercegovin \| Čehanma \| Danii \| Estinma \| Francii \| Grekanma \| Gruzii¹ \| Horvatii \| Irlandii \| Islandii \| Ispanii \| Italii \| Kazahstan¹ \| Kipr¹ \| Latvii \| Lihtenštein \| Litvanma \| Lüksemburg \| Mad'jaranma \| Mal't \| Moldov \| Monako \| Mustmägi \| Norvegii \| Pohjoižmakedonii \| Pol'šanma \| Portugalii \| Ročinma \| Romanii \| San Marino \| Saksanma \| Serbii \| Slovakii \| Slovenii \| Suomenma \| Sur' Britanii \| Šveicarii \| Turkanma¹ \| Ukrain \| Vatikan \| Vaugedvenäma \| Venäma¹
	¹ Om Azijas mugažo.

[1] Mustmägin ristitišton lugun endustuz vn 2018 heinkus. // Mail'man faktoiden kirj. — Cia.gov. (angl.)

[2] De facto. Formaližikš valdkund eile evron zonan ühtnijan.

[3] Mugažo .yu kuti enzne Jugoslavijan valdkund-ühtnii.

[4] Mustmägin Konstitucii parlamentan oficialižel saital (skupstina.me). (mustm.)

[5] Mustmägin Konstitucijan tekst constituteproject.org-saital. (angl.)

[6] Mustmägi tundišti Kosovon ripmatomut. — Lenta.ru. (ven.)

[7] Гора у бројкама (Mustmägin polhe luguil). — Завод за статистику Црне Горе (Mustmägin statistikan radnikoičend, monstat.org), 2008. (mustm.)

[8] Prvi rezultati, Popis stanovništva, domaćinstava i stanova u Crnoj Gori 2011 (Mustmägin ezmäižen rahvahanlugemižen rezul'tatad vl 2011). — Zavod za statistiku Crne Gore (monstat.org). (mustm.)

[1]

[2]

[3]

[4]

[5]

[6]

[7]

[8]