Seišelan Sared

Seišelan Sariden Tazovaldkund
Repiblik Sesel (seiš.)
République des Seychelles (fr.)
Republic of Seychelles (angl.)

Flag	Valdkundznam
Pälidn	Viktorii
Eläjiden lugu (2018)	94,633 ristitud
Pind	455 km²
Kel'	seišelan, francijan, anglijan
Valdkundan pämez'	Uovel Ramkalavan
Päministr	eile olmas
Religii	hristanuskond
Valüt	Seišelan rupii (SCR)
Internet-domen	.sc
Telefonkod	+248
Aigvö	UTC+4

Seišelan Sared vai Seišelad, täuz' oficialine nimituz — Seišelan Sariden Tazovaldkund (seiš.: Repiblik Sesel [repibˈlik seˈsel], franc.: République des Seychelles [ʁe.py.bˈlik de sɛˈʃɛl], angl.: Republic of Seychelles [rɪˈpʌblɪk ɒv seɪˈʃɛlz]), om sar'hine valdkund Päivnouzmaižes Afrikas. Sen pälidn da kaikiš suremb lidn om Viktorii.

Istorii

Vn 1976 29. päiväl kezakud Seišelan Sared tedištoitiba ičeze ripmatomudes Sures Britanijaspäi.

Valdkundan videnz' lugul Konstitucii om vahvištadud vl 1993, se om väges äiluguižidenke vajehtusidenke.

Geografijan andmused

Seišeloiden kart (2005)

Seišelad sijadasoiš pohjoižpolehe Madagaskaraspäi.

Seišelan Sariden randad lainištab Indine valdmeri. Randanpird — 491 km.

Politine sistem

Seišeloiden parlamentan pert' Viktorii-pälidnas i sen seičemenz' kucund vl 2020

Ohjandusen form om unitarine prezidentine tazovaldkund äjiden partijoiden sistemanke. Valdkundan da ohjastusen pämez' om prezident (seiš.: Prezidan Larepiblik Sesel, franc.: Président de la République des Seychelles, angl.: President of the Republic of Seychelles). Kaik rahvaz valičeb händast videks vodeks, üks' kahtenz' strok om voimusine.

Käskusenandai tobmuz om üks'kodine parlament. Se om Rahvahaline Suim (seiš.: Lasanble Nasyonal, franc.: Assemblée nationale, angl.: National Assembly) 35 ezitajanke. Heiden valdatusiden strok om viž vot, kaik rahvaz valičeb.

Seišeloiden generaližed valičendad oliba vn 2020 22.-24. päivil redukud, valitihe valdkundan prezidentad (järgenduseližed) i parlamentan ühtnijoid (edelstrokuižed valičendad ühtenzoitmaha niid prezidentan valičendoidenke). Voziden 2016−2020 Denni For-prezident sai kilad. Prezident om Uovel Ramkalavan vn 2020 redukun 26. päiväspäi (sai 54,91 % änid), hän oli parlamentižen oppozicijan lideraks vll 1998−2011 and 2016−2020, ühtni prezidentan edeližihe nellhä valičendoihe (2001, 2006, 2011, 2016), no sai kildust joga kerdan enamba mi 40 % änid rezul'tatanke. Parlamentan seičemenz' kucund om valitud da radab vn 2020 redukuspäi.

Administrativiž-territorialine jagand

   Kacu kirjutuz: Seišelan Sariden administrativiž-territorialine jagand.

Seišelan Sared jagasoiš 25 ümbrikoks (angl.: district).

Eläjad

Seišelan Saril elädas seišelalaižed. Vn 2014 heinkus valdkundan ristitišt oli 91 650 eläjad.

Uskondan mödhe (2010): riman katolikad — 76,2 %, protestantad — 10,5 %, toižed hristanuskojad — 2,4 %, induistad — 2,4 %, islamanuskojad — 1,6 %, toižed uskojad — 1,1 %, märhapanendata — 4,9 %, religijatomad — 0,9 %.

Ižanduz

Seišelad oma šingotai ma, kaikiš elokahambišpäi Afrikas. Ižandusen baz om turistoiden holituz, ofšor i maižanduz. Mail'man enamba 140 tuhad kompanijoid oma registriruidud sariden ofšoras. Lindvodind om maižandusen aluseks, kazvatadas nenid kul'turoid: cinnamon, batat, tapiok, bananad. Kalanpüdand andab torhut konserviruidud da kül'menzoittud kalan tehmižen täht, kudamb om eksportan päpalaks.

Kogosüdäiproduktan palad (2017): maižanduz — 2,5 %, tegimišt — 13,8 %, holitišiden sfer — 83,7 %. Radajiden järgenduz sektoroidme (2006): maižanduz — 3 %, tegimišt — 23 %, holitišiden sfer — 74 %.

Irdkosketused

• Seišelan Sariden prezidentan oficialine sait (statehouse.gov.sc). (angl.)
• Seišelan Sariden parlamentan oficialine sait (nationalassembly.sc). (angl.)
• Seišelan Sariden e-ohjastusen oficialine portal (egov.sc). (angl.)