Bronnici

Bronnici
Бронницы

Lidnanznam	Flag
Valdkund	Venäma
Eläjiden lugu (2020-01-01)	22,531 ristitud
Pind	22,16 km²
Pämez'	Dmirii Lisenkov (sügüz'ku 2019—. Дмитрий Лысенков)
Telefonkod	+7−49 646-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Bronnici (vai Bronnicad, ven.: Бро́нницы) om Venäman lidn da lidnümbrik Moskvan agjan keskuzpalan suvipäivnouzmas. Se om ümbärtud Ramenskojen lidnümbrikon territorijal.

Istorii

Eländpunkt mainitase vspäi 1453 kuti Broniči-torguindžilo (ven.: Броничи), oli Moskvan ruhtinasiden i Venäman cariden žiloks. Hebonferman aluz oli pandud Bel'skoje-johtan luhtoidenno Födor III-carin aigan 17. voz'sadan lopus, hebonraccastajiden polk sijazihe lidnas 19. voz'sadal. Žilo sai makundan lidnan statusad vn 1781 5. päiväl redukud. Francine armii toi äjid murendusid lidnale vn 1812 sügüzel. Lidn oli makundan keskuseks vhesai 1924. Mülütihe Ramenskojen rajonha vll 1929−1992.

Bronnici šingotase valamižmehanižel tegimel, pun i metallan ümbriradmižen edheotandoil, juvelirtegesiden pästandal, omblendfabrikal, sor'mikoiden fabrikal. Nevondkundaližen aigan savičtegim radoi mugažo.

Geografijan andmused

Lidn sijadase Moskv-jogen oiktal randal, 120 m ü.m.t. keskmäižel korktusel. Moskvanjogen Bel'skoje-järv-joht (ven.: Бельское) om lidnan pohjoižröunaks. Kožurnovskii-uit om saudud Moskvan penel Kožurnovk-ližajogel lidnan keskuzpalan suvipäivnouzmas. Matkad Moskvhasai om 52 km lodeheze. Lähembaižed lidnad oma Domodedovo 25 km päivlaskmha avtotedme sen rahvahidenkeskeižhe lendimporthasai, Ramenskoje 20 km pohjoižhe orhal, Beloozörskii 10 km pohjoižpäivnouzmha orhal i Voskresensk 25 km päivnouzmha-suvipäivnouzmha orhal.

«Ural»-avtote (M5-trass) mäneb 1 km päivlaskmha lidnaspäi («Moskv — Räzan'»-keskust). Moskvan pen' rengaz (A107-trass) läbitab lidnan suvipalad. Lähembaine Bronnici-raudtestancii radab 10 km pohjoižpäivnouzmha lidnaspäi «Moskv — Räzan'»-keskustal vspäi 1862, žilo stancijanno sijadase Ramenskojen lidnümbrikos, om avtobusühtenzoitust Bronnici-lidnanke.

Bronnici om lidn oiktanke alištusenke agjan tobmudele, lidnümbrikon üks'jäine eländpunkt.

Eläjad

Vl 1939 lidnan ristitišt oli 6 127 eläjad, vl 1959 — 10 107 eläjad. Vn 2010 Venäman rahvahanlugemižen mödhe lidnan eläjiden lugu oli 21 102 ristutud. Kaikiš suremb ristitišt om 21..22 tuhad eläjid vspäi 2010 (22 643 rist. vl 2019). Ortodoksižen hristanuskondan Ph. Mikoi-arhangelan päjumalanpert', kaks' jumalanpertid i kaks' časounäd oma olmas lidnas.

Rahvahad (2010): venälaižed — 91,8%, ukrainalaižed — 2,3%, uzbekad — 1,4%, toižed rahvahad — 4,3%, rahvahuden ozutandata — 0,2%.

Professionaližen opendusen aluzkund om Moskvan agjan avtotesauvondan kolledž.

Galerei

• 
  Policijan palakund, ende kundaline pert'
• 
  Ph. Mikoi-arhangelan päjumalanpert' kellčuhundusenke
  (vn 2014 nägu)
• 
  Simvoližen hebon skul'ptur
• 
  Jaugnikoiden sild Bel'skoje-järves päliči
• 
  Bronnici-stancijan raudteplatform
  (2010)

Irdkosketused

• Lidnümbrikon tobmuden aluzkundoiden oficialine sait (bronadmin.ru). (ven.)