Aprelevk

Aprelevk
Апрелевка

Lidnanznam	Flag
Valdkund	Venäma
Eläjiden lugu (2020-01-01)	30,669 ristitud
Pind	29 km²
Telefonkod	+7−496−345-xx-xx
Avtokod	50, 90, 150, 190, 750
Aigvö	UTC+3 (MSK+0)

Aprelevk (ven.: Апре́левка) om Venäman lidn Moskvan agjan keskuzpalan suvipäivlaskmas. Mülüb Naro-Fominskan lidnümbrikho (edel vn 2017 kezakud — rajonha), sen kahtenz' surtte lidn koumespäi.

Istorii

Eländpunktan aluz om pandud vl 1899 kuti žilo udenno Aprelevk-raudtestancijanno. Raudtestancii sai nimitust lähižen usadiban mödhe, saudihe usadibad Oprelovk-jogen randal (ven.: Опреловка vai Апреловка). Vl 1899 panihe savičtegimen alust, vl 1910 — grammofonan platoiden tegint (vspäi 2002 eile rados). Kätihe radnikžiloks vl 1935. Žilo sai lidnan statusad vl 1961.

Aprelevk šingotase sauvondmaterialiden pästandal (lämuzizoläcii), röntgentehnikan i märičendladimiden tehmižel, hokkeiforman i čulkoiden edheotandoil. Küläsauvondan tedoinstitut.

Geografijan andmused

Lidn sijadase lidnümbrikon pohjoižpäivnouzmaiženno röunanno, Desn-jogen hural randal (ven.: Десна́ 88 km pitte, Moskvan oigedpol'ne bassein), 190 m ü.m.t. keskmäižel korktusel. Desn om lidnan suvipäivlaskmaižeks röunaks. Matkad Moskvhasai om 0..1 km suvipäivnouzmha (Uden Moskvan Novomoskovskii i Troickan ümbrikoiden röun), Moskvan rengazavtotehesai — 30 km pohjoižpäivnouzmha. Toižed lähembaižed lidnad oma Krasnoznamensk 2 km pohjoižhe i Golicino 6 km lodeheze orhal, lidnümbrikon Naro-Fominsk-keskuz 28 km suvipäivlaskmha teidme.

Aprelevk-raudtestancii radab lidnan keskuzpalas vspäi 1899 «Moskv (Kijevan päraudtestancii) — Obninsk»-keskustal, matkad päraudtestancijhasai om 42 km. Kaks' platformad oma sen ližaks: Pobed pohjoižpäivnouzmas i Dačnai päivlaskmas. «Ukrain»-avtote (M3-trass) om lidnan suviröunaks.

Eläjad

Vl 1939 žilon ristitišt oli 5 742 eläjad, vl 1959 — 14 936 eläjad. Vn 2010 Venäman rahvahanlugemižen mödhe lidnan eläjiden lugu oli 18 349 ristutud, lidnümbrikon kümnendez. Kaikiš suremb ristitišt om nügüd'. Ortodoksižen hristanuskondan ph. Illöi-endustajan jumalanpert' om saudud lidnas vodele 2002.

Rahvahad (2010): venälaižed — 94,1%, ukrainalaižed — 1,5%, armenijalaižed — 1,1%, toižed rahvahad — 3,3%.

Professionaližen opendusen aluzkundad ratas lähembaižiš lidnoiš.

Galerei

• 
  Illija-endustajan jumalanpert'
• 
  «Melodii»-sportpert'kulu
• 
  Aprelevk-raudtestancii
  (2010)

Irdkosketused

• Lidnümbrikon tobmuden aluzkundoiden oficialine sait (nfreg.ru). (ven.)
• Enččen lidnankundan sait (апрелевка.рф). (ven.)