Lüberci

Lüberci
Люберцы

Lidnanznam	Flag
Valdkund	Venäma
Eläjiden lugu (2024)	236,339 ristitud
Pind	12,87 km²
Telefonkod	+7−495-xxx-xx-xx, +7−496, +7−498
Avtokod	50, 90, 150, 190, 750
Aigvö	UTC+3 (MSK+0)

Lüberci (ven.: Лю́берцы) om Venäman lidn da raudtesol'm Moskvan agjan keskuzpalan päivnouzmas. Se om Moskvan päivnouzmaine ezilidn, agjan kudenz' lidn eläjiden lugun mödhe, Lüberci-lidnümbrikon (edel vn 2017 vilukud — rajonan) administrativižeks keskuseks da palaks.

Istorii

Eländpunkt mainitase ezmäižen kerdan vl 1621 kuti Liberici-Nazarovo-külä (ven.: деревня Либерицы-Назарово). Purtkespäi om sel'ged, miše külä oli ende-ki, nimitihe jogen (Liberici) i pidajan (Nazarov) mödhe. Saudihe Spasan Toižetamižen pühäpertid vodele 1632 (om likvidiruidud vl 1936, saudihe ut vll 1993−2008). Aleksandr Menšikov-ruhtinaz valdoiči žilos vspäi 1705, sauvoi pert'kulud, kivišt padoseinäd puištonke, i udesnimiti Novo-Preobraženskoje:ks, möhemba Liberici möst. Vll 1862−1864 saudihe raudteid žilonno Kolomnhasai i Räzanihesai. Sätud vl 1899 purumašinoiden tegim radaškanzi vspäi 1910 maižanduzmašinoiden tegimeks. Radnikžilo sai lidnan statusad vl 1925. Mülütihe lähižid žiloid lidnha vl 1934. Kätihe Lübercin päivlaskmad Moskvan palaks vl 1984 (nüg. Kosino- i Žulebino-rajonad).

Lüberci šingotase «Ka»-punolendimiden tegimel, maižanduzmašinoiden tegimel (oz., saharrogon obrädindkombainad), sauvondmaterialiden pästandal (niiden kombinat, alüminiikonstrukcijoiden tegim pertiden täht maižanduzmašinoiden tegimen cehoiden palas), kouroiden tehmižühtelmasel i torguindmašiništon edheotandal.

Geografijan andmused

Lüberci-lidnümbrikon sijaduz agjas vn 2010 kartal

Lidnümbrikon kart (2014)

Lidn sijadase lidnümbrikon lodehes da keskuses, 130 m ü.m.t. keskmäižel korktusel. Röunatab Moskvanke päivlaskmas, Moskvan rengazavtote om kahtes kilometras lidnaspäi. Pehork-jogi (ven.: Пехо́рка 42 km pitte, Moskvan hura ližajogi) jokseb ühtes..koumes kilometras päivnouzmha lidnaspäi. Toižed lähembaižed lidnad oma Kotel'niki ani suvipäivlaskmha i Dzeržinskii nelläs kilometras suvipäivlaskmha.

«Ural»-manten «Moskv — Räzan'»-keskust (M5-trass) om lidnan suvipäivlaskmaižeks röunaks. Kaik viž metrostancijad ümbärtas lidnad Moskvan territorijal. Lüberci I-raudtestancii radab lidnan keskuzpalas, Lüberci II- i Panki-raudtestancijad oma saudud päivnouzmas. Matkad elektrojonusel Kazanin päraudtestancijhasai om 19 km.

Edel 2017. vot lidnankundan pind oli 43,68 km², Tomilinon puišt oti sen znamasišt palad.

Eläjad

Vl 1939 lidnan ristitišt oli 46 491 eläjad, vl 1959 — 93 255 eläjad. Vn 2010 Venäman rahvahanlugemižen mödhe lidnan eläjiden lugu oli 172 525 ristutud, rajonan (nüg. lidnümbrik) kaks' koumandest, vn 2021 — 224 195 ristitud. Kaik 197 705 eläjad oli lidnas vl 2017. Kaikiš suremb lidnan ristitišt om nügüd', enamba 200 tuhad eläjid vspäi 2018.

Rahvahad (ozutadud rahvahudenke vl 2010): venälaižed — 93,3 %, ukrainalaižed — 1,5 %, armenijalaižed — 1,3 %, toižed rahvahad — 3,9 %.

Ortodoksižen hristanuskondan kahesa pühäpertid oma saudud lidnas: kuz' jumalanpertid i kaks' časounäd.

Openduz

Lapsiden opendusen aluzkundad oma päivkodid, keskškolad.

Professionaližen opendusen aluzkundad oma Lübercin tehnikum, Moskvan agjan medicinižen kolledžan nomer 2 (Ramenskoje) Lübercin filial, üläopendusen aluzkundad (kaivuztöiden institut, muitakademii, fizkul'turan akademii) da seičeme filialad (Moskv).

Galerei

• 
  Triumf-sportpert'kulu i lidnümbrikon tobmuden sauvuz (2022)
• 
  Krumingan pert' (2018)
• 
  Spasan Toižetamižen jumalanpert', vn 2016 nägu
• 
  Kaivuztöiden institutan päsauvuz (vn 2015 olend)
• 
  Venäman muitakademijan sauvused (2008)
• 
  Lübercin tehnikuman üks' sauvusišpäi (2015)
• 
  Lübercin kul'turkeskuz (2022)
• 
  Lüberci I-raudtestancii vl 2007

Irdkosketused

• Lidnümbrikon tobmuden aluzkundoiden oficialine sait (люберцы.рф). (ven.)
• Lidnan informacine sait (inlubertsy.ru). (ven.)