Lüberci

Lüberci
Люберцы

Lidnanznam	Flag
Valdkund	Venäma
Eläjiden lugu (2020-01-01)	205,295 ristitud
Pind	12,87 km²
Telefonkod	+7−495-xxx-xx-xx. +7−496, +7−498
Avtokod	50, 90, 150, 190, 750
Aigvö	UTC+3 (MSK+0)

Lüberci (ven.: Лю́берцы) om Venäman lidn da raudtesol'm Moskvan agjan keskuzpalan päivnouzmas. Se om Moskvan päivnouzmaine ezilidn, agjan kudenz' lidn eläjiden lugun mödhe, Lübercin lidnümbrikon (edel vn 2017 vilukud — rajonan) administrativine keskuz.

Istorii

Eländpunkt mainitase ezmäižen kerdan vl 1621 kuti Liberici-Nazarovo-külä (ven.: Либерицы-Назарово). Purtkespäi om sel'ged, miše külä oli ende-ki, nimitihe jogen (Liberici) i pidajan (Nazarov) mödhe. Saudihe Spasan Toižetamižen pühäpertid vodele 1632 (om likvidiruidud vl 1936, saudihe ut vll 1993−2008). Aleksandr Menšikov-ruhtinaz valdoiči žilos vspäi 1705, sauvoi pert'kulud, kivišt padoseinäd puištonke, i udesnimiti Novo-Preobraženskoje:ks, möhemba Liberici möst. Vll 1862−1864 saudihe raudteid žilonno Kolomnhasai i Räzanihesai. Sätud vl 1899 purumašinoiden tegim radaškanzi vspäi 1910 maižanduzmašinoiden tegimeks. Radnikžilo sai lidnan statusad vl 1925. Mülütihe lähižid žiloid lidnha vl 1934. Kätihe Lübercin päivlaskmad Moskvan palaks vl 1984 (nüg. Kosino- i Žulebino-rajonad).

Lüberci šingotase «Ka»-punolendimiden tegimel, maižanduzmašinoiden tegimel (oz., saharrogon obrädindkombainad), sauvondmaterialiden pästandal (niiden kombinat, alüminiikonstrukcijoiden tegim pertiden täht maižanduzmašinoiden tegimen cehoiden palas), kouroiden tehmižühtelmasel i torguindmašiništon edheotandal.

Geografijan andmused

Lidn sijadase lidnümbrikon lodehes da keskuses, 130 m ü.m.t. keskmäižel korktusel. Röunatab Moskvanke päivlaskmas, Moskvan rengazavtote om 2 kilometras lidnaspäi. Pehork-jogi (ven.: Пехо́рка 42 km pitte, Moskvan hura ližajogi) jokseb 1..3 km päivnouzmha lidnaspäi. Toižed lähembaižed lidnad oma Kotel'niki ani suvipäivlaskmha i Dzeržinskii 4 km suvipäivlaskmha.

«Ural»-manten «Moskv — Räzan'»-keskust (M5-trass) om lidnan suvipäivlaskmaižeks röunaks. Viž metrostancijad ümbärtas lidnad Moskvan territorijal. Lüberci I-raudtestancii radab lidnan keskuzpalas, Lüberci II- i Panki-raudtestancijad oma saudud päivnouzmas. Matkad elektrojonusel Kazanin päraudtestancijhasai om 19 km.

Edel 2017. vot lidnankundan pind oli 43,68 km². Tomilinon puišt otab sen znamasišt palad.

Eläjad

Vl 1939 lidnan ristitišt oli 46 491 eläjad, vl 1959 — 93 255 eläjad. Vn 2010 Venäman rahvahanlugemižen mödhe lidnan eläjiden lugu oli 172 525 ristutud, rajonan (nüg. lidnümbrik) kaks' koumandest. Kaikiš suremb ristitišt om enamba 200 tuhad eläjid vspäi 2018 (207 349 rist. vl 2019). Ortodoksižen hristanuskondan kuz' jumalanpertid i kaks' časounäd oma olmas lidnas.

Rahvahad (2010): venälaižed — 93,3%, ukrainalaižed — 1,5%, armenijalaižed — 1,3%, toižed rahvahad — 3,9%.

Professionaližen opendusen aluzkundad oma Lübercin tehnikum, Moskvan agjan medicinižen kolledžan nomer 2 (Ramenskoje) Lübercin filial, üläopendusen aluzkundad (kaivuztöiden institut, muitakademii, fizkul'turan akademii) da seičeme filialad (Moskv).

Galerei

• 
  Krumingan pert'
• 
  Spasan Toižetamižen jumalanpert'
  vl 2016
• 
  Venäman muitakademii
• 
  Lübercin tehnikuman üks' sauvusišpäi
• 
  Lüberci I-raudtestancii vl 2007

Irdkosketused

• Lidnümbrikon tobmuden aluzkundoiden oficialine sait (люберцы.рф). (ven.)
• Lidnan informacine sait (inlubertsy.ru). (ven.)