Volgogradan agj

Volgogradan agj
Волгоградская область

Volgogradan agjan flag Volgogradan agjan znam
Pälidn	Volgograd
Pind - Ühtes - saum vezid (%).	31-nz' 112 877 km² 4,34
Eläjiden lugu - Kaik - Sageduz	19-nz' 2,521,276 ristitud (2018) 22,34 rist./km²
Regionaline KSP - Kaik, nügüdläižiš arvoiš - Ühtele hengele	25-nz' 743,3 mlrd rub. (2016) 292,6 tuh. rub.
Federaline ümbrik	Suvine
Venäman ekonomine region	Volganrandaline
Valdkundkel' (-keled)	venäkel'
Gubernator	Andrei Bočarov
Administracijan pämez'	hän-žo
Agjan Duman ezimez'	Nikolai Semisotov
Avtokod	34, 134
Aigvöd	UTC+3 (MSK+0)

Volgogradan agj (ven.: Волгоградская область) om Venälaižen Federacijan subjekt.

Se mülüb Federaližhe suviümbrikho.

Agjan administrativine keskuz da kaikiš suremb lidn om Volgograd-vägilidn.

Keled

Valdkundkel' om üks'jäine — venäkel'.

Istorii

Volgogradan agj om olmas vs 1936 tal'vkun 5. päiväspäi. Vozil 1936−1961 nimitihe sidä Stalingradan agjaks.

Volgogradan agjan Päkäskuz om vahvištadud vn 2012 24. päiväl uhokud Agjan Duman ezitajil. Se oti enččen Päkäskusen sijad (oli vahvištadud vl 1996).

Geografijan andmused

Volgogradan agjan reljefan kart.

Agj röunatab Kazahstananke päivnouzmas (sen Päivlaskmaiž-Kazahstanan agjanke), Astrahanin agjanke suvipäivnouzmas, Kalmikijan Tazovaldkundanke suves, Rostovan agjanke suvipäivlaskmas, Voronežan agjanke lodehes da Saratovan agjanke pohjoižes. Ühthine röunoiden piduz om 2221,9 km. Volgogradan agj om mererandatoi.

Pind om 112 877 km², sidä kesken mustma otab 22%, kaštanmujuine ma — 44%, mec — 6 990 km². Znamasižed joged oma Don (sen Medvedic-ližajogenke) da Volg. Kaikiš surembad vezištod oma ratud Cimlänskan vezivaradim Rostovan agjanke röunal da Volgogradan vezivaradim.

Reljef om kukhikaz. Volgan hura randišt om pol'letetazangištoks. Kaikiš korktemb čokkoim om Volganrandaližen ülüden nimetoi kukkaz (358 m).

Klimat om terav kontinentaline kuivahk. Heinkun keskmäine lämuz om +23..+25 C°, vilukun lämuz om −8..−12 C°. Paneb sadegid 500 mm päivlaskmas da 300 mm päivnouzmas. Lumikate venub 90..110 päiväd vodes.

Londuseližed varad oma londuseline gaz, kivivoi, metallad (raudkivend, magnii, titan, cirkonii), sauvondmaterialad (letked, saved, sauvondgips, mouckivi), kaliisol, fosforitad, keitandsol, reskvezi, gidroenergii.

Tobmuz

Agjan gubernatoran, Administracijan da Duman ištundsija Volgogradas.

Agjan pämez' nimitase gubernatoraks. Andrei Bočarov radab gubernatoran vs 2014 sulakun 4. päiväspäi. Kaik rahvaz änestab händast videks vodeks. Gubernator om mugažo agjan Administracijan pämez', hän märičeb sen strukturad da paneb sen ühtnijoid radnikusile. Kaks' ezmäšt varagubernatorad da kuz' muite varagubernatorad oma hänele abhu.

Volgogradan agjan üks'kodine parlament om Agjan Dum. Kaik rahvaz valičeb sen 38 ezitajad videks vodeks. Nikolai Semisotov radab Agjan Duman ezimeheks vs 2014 redukun 2. päiväspäi.

Radonoigendai tobmuz om Volgogradan agjan Administracii. Agjan komitetad da inspekcijad alištudas Administracijale.

Vn 2014 14. päiväl sügüz'kud valitihe gubernatorad, nügüdläine gubernator sai vägestust ezmäižel tural (88,49% änid). Agjan Duman ühtnijoiden järgenduseližed valičendad oliba sil-žo päiväl.

Eläjad

Vn 2010 Venäman rahvahanlugemižen mödhe eläjiden lugu oli 2 610 161 ristitud. Kaikutte koumanz' ristit nelläspäi om lidnalaine.

Kaik om ühesatoštkümne lidnad agjas da 25 lidnanvuittušt žilod. Toižed järedad lidnad (enamba 100 tuh. ristituid, surembaspäi penembha) oma Volžskii da Kamišin.

Rahvahad (enamba 0,5% vl 2010): venälaižed — 88,5%, kazahlaižed — 1,8%, ukrainalaižed — 1,4%, armenijalaižed — 1,1%, totarlaižed — 0,9%, azerbaidžanlaižed — 0,6%, toižed rahvahad — 4,0%, rahvahuden ozutandata — 1,7%.

Irdkosketused

• Volgogradan agjan gubernatoran da Administracijan oficialine portal (volganet.ru). (ven.)
• Volgogradan agjan Duman oficialine sait (volgoduma.ru). (ven.)